घोराही (दाङ), : दाङको घोराहीमा जारी ‘दाङ क्रिकेट लिग–२’अन्तर्गत आज भएका खेलमा तुलसीपुर रोयल्स र घोराही टाइगर्स विजयी भएका छन् । दाङ क्रिकेट सङ्घको आयोजनामा घोराही–१७ गुलरियास्थित घोराही क्रिकेट मैदानमा भएको पहिलो खेलमा तुलसीपुर रोयल्सले दङ्गाली लायन्सलाई २७ रनले तथा अर्को खेलमा घोराही टाइगर्सले पुरन्धारा च्यालेन्जर्सलाई दुई विकेटले पराजित गरेको हो । टस हारेर पहिला ब्याटिङ गरेको तुलसीपुर रोयल्सले निर्धारित २० ओभरमा चार विकेट गुमाएर एक सय २५ रन बनाएको थियो ।
जवाफमा दङ्गाली लायन्सले सबै विकेट गुमाएर ९८ रन मात्रै बनायो । यस्तै, अर्को खेलमा टस जितेर ब्याटिङ गरेको पुरन्धाराले निर्धारित २० ओभरमा आठ विकेट गुमाउँदै एक सय १७ रन बनायो । जवाफी ब्याटिङ गरेको घोराहीले १९ दशमलव चार ओभरमा आठ विकेट गुमाएर एक सय १८ रनको लक्ष्य पूरा गर्यो ।
