मुगु, १५ साउन
मुगु र जुम्लाको सिमानामा पर्ने बुलबुले मैपानीमा आइतबार बिहान जिप दुर्घटना हुँदा एक यात्रुको घटनास्थलमै मृत्यु भएको छ । सुर्खेतदेखि मुगु गमगढी तर्फ आउँदै गरेको लु १ ज ३७५४ नम्बरको जिप मुगु र जुम्लाको सिमाना पर्ने बुलबुले मैपानी भन्ने स्थानमा दुर्घटना हुँदा २४ वर्षीय दीपक तिरुवाको घटनास्थलमै मृत्यु भएको र चालक दल बुढा घाइते भएको प्रहरी नायव उपरीक्षक सुवास हमालले बताए ।
चालक बुढालाई उपचारका लागि जुम्ला लगिएको बताइएको छ । मृतक छायाँनाथ रारा नगरपालिका-२ तलितुम तिरुवाबाडा गाउँका रहेको बताएको छ । उक्त जिपमा रहेका अन्य चार यात्रु भने सकुशल रहेका छन् । दुर्घटनाको कारण पत्ता लगाउन प्रहरीले अनुसन्धान थालेकाे डीएसपी हमालले बताए ।
