अफ्रिकी सङ्घको सदस्यताले वैश्विक चुनौती सामना गर्न सहज हुने

केन्याका राष्ट्रपति विलियम रुटोले युरोपेली सङ्घसहित १९ वटा विशाल अर्थतन्त्र भएका राष्ट्रको अन्तर सरकारी सङ्गठन जी २० मा अफ्रिकी सङ्घको प्रवेशले वैश्विक चुनौती सामना गर्न सहज हुने बताउनुभएको छ । साथै उहाँले अब अफ्रिका महादेश विश्वमा देखिने र उसका आवाज पनि सुनिने बताउनुभएको छ । नयाँदिल्लीमा आज प्रारम्भ भएको जी २० शिखर बैठकमा अफ्रिकी सङ्घलाई समूहको स्थायी सदस्यता प्रदान गरिएपछि केन्याली राष्ट्रपतिले हालै सम्पन्न अफ्रिका जलवायु शिखर सम्मेलनमा अन्तरराष्ट्रिय वित्तीय संस्था र बहुपक्षीय विकास ब्याङ्कहरूको आधारभूत सुधारलाई जोड दिइएको बताउँदै जी २० को माध्यमबाट यी मुद्दालाई अझ सशक्त रूपमा अघि बढाउन सहज हुने बताउनुभयो । यसैगरी अफ्रिकी सङ्घ (एयु) आयोगका प्रमुख मौसा फकी महामतले जी २० मा भएको एयुको प्रवेशको स्वागत गर्दै लामो समयदेखि आफूहरूले गरेको अनुरोध आज साकार भएको बताउनुभएको छ । अब अफ्रिकाको पक्षमा पैरवी गर्न अझ सहज भएको उहाँले बताउनुभएको छ । अफ्रिकी सङ्घमा ५५ सदस्य मुलुक भए पनि सैनिक शासन भएका छ देशलाई निलम्बन गरिएको छ ।