भानुभक्त जन्मस्थलको विकासमा गम्भीर छौँ : मुख्यमन्त्री पाण्डे

गण्डकी प्रदेशका मुख्यमन्त्री सुरेन्द्रराज पाण्डेले आदिकवि भानुभक्त आचार्यको जन्मस्थल भानु नगरपालिका–४ चुँदीरम्घाको विकासमा प्रदेश सरकार गम्भीर रहेको बताउनुभएको छ । भानु जन्मस्थल विकास समितिको आयोजनामा भानु नगरपालिका–४ चुँदीरम्घामा शुक्रबार आयोजित दुई सय १०औँ भानु जयन्तीका अवसरमा उहाँले भानु जन्मस्थलको विकास गरी चुँदीरम्घालाई साहित्यिक गन्तव्यका रूपमा विकास गर्ने गरी प्रदेश सरकार अग्रसर रहने बताउनुभयो । आफूले भानु जन्मस्थलको पहिलो पटक अवलोकन गरेको र पर्याप्त विकास हुन नसकेकोमा दुःख लागेको मन्त्री पाण्डेको भनाइ छ । “मैले पनि पहिलो पटक भानुभक्त जन्मिएको घरलगायत संरचनाको अवलोकन गर्ने अवसर पाएँ”, मुख्यमन्त्री पाण्डेले भन्नुभयो, “तर भानु जन्मस्थलको जति विकास हुनुपर्ने हो, त्यति हुन सकेको जस्तो लागेन । यस क्षेत्रलाई पर्यटकीय गन्तव्य बनाउने गरी अघि बढ्ने छौँ ।” आदिकवि भानुभक्त आचार्यले साहित्यको माध्यमबाट नेपाली भाषा र साहित्यलाई विदेशसमेतमा चिनाउन सफल हुनुभएकाले योगदानको सबैले कदर गर्नुपर्नेमा मुख्यमन्त्री पाण्डेले जोड दिनुभयो । उहाँले भानु जन्मस्थल विकास समितिद्वारा प्रकाशित पुस्तक भानुभक्तको रामायणसमेतको विमोचन गर्नुभएको थियो । कार्यक्रममा साहित्यको क्षेत्रबाट योगदान पु¥याउने साहित्यकार काशीनाथ न्यौपाने, मेदिनी शर्मा र साम्पा उपाध्यायलाई नगद पुरस्कारसहित र दोसल्लाले सम्मान गरिएको थियो । रामायण वाचन प्रतियोगितामा प्रथम, दोस्रो र तेस्रो हुने क्रमशः आराध्या ढकाल, स्वाधीनता पौडेल र प्रस्तुती आचार्यलाई नगदसहित पुरस्कृत गरिएको थियो । त्यसैगरी कविता प्रतियोगितामा प्रथम, दोस्रो र तेस्रो हुने क्रमशः नवलपुरका दयाराम पौडेल, तनहुँका विवेक पराजुली र विनायक नेपालीले नगदसहित पुरस्कार प्राप्त गर्नुभएको थियो । भानु जयन्तीको अवसरमा स्थानीयवासीले विभिन्न जातीय झाँकी प्रदर्शन गरेका थिए । नेपाली कांग्रेसका नेता गोविन्द भट्टराई, जिल्ला समन्वय समिति तनहुँका प्रमुख शान्तिरमण वाग्ले, व्यास नगरपालिकाका प्रमुख वैकुण्ठ न्यौपाने, ऋषिङ गाउँपालिकाका अध्यक्ष राजेन्द्रकृष्ण श्रेष्ठ, भानु जन्मस्थल विकास समितिका कार्यकारी निर्देशक शङ्कर रानाभाट, साहित्यकार तथा आदिकवि आचार्यका खनातीहरू काशिराज आचार्य र विधान आचार्यलगायतले भानुभक्तको योगदानको चर्चा गर्दै संरक्षणमा सबै पक्षबाट पहल हुनुपर्नेमा जोड दिनुभएको थियो । विभिन्न सङ्घ संस्थासहित प्रदेश र सङ्घीय सरकारको सहयोगमा भानु जन्मस्थलको विकासका लागि देखिने गरी काम अघि बढाउन आफूहरू सकारात्मक रहेको भानु नगरपालिकाका प्रमुख आनन्दराज त्रिपाठीले बताउनुभयो । “यो वर्ष भानु जन्मस्थलको विकासमा हामी तीव्ररूपमा लाग्ने छौँ”, नगरप्रमुख त्रिपाठीले भन्नुभयो, “त्यसका लागि सबै पक्षबाट सकारात्मक सहयोगको अपेक्षा गरेका छौँ ।”