साहित्य समाजको ऐना हो– प्रदेश प्रमुख खापुङ

कोशी प्रदेशका प्रदेश प्रमुख परशुराम खापुङले साहित्य समाजको ऐना भएको बताउनुभएको छ । प्रतिभा पुरस्कार प्रतिष्ठान विराटनगरद्वारा आदिकवि भानुभक्त आचार्यको दुई सय १०औँ जन्मजयन्तीको उपलक्ष्यमा आज यहाँ आयोजित पुरस्कार तथा सम्मान समर्पण समारोहमा उहाँले ऐनाले सधैँ सक्कल चरित्र र कुरा मात्रै देखाउने विचार राख्नुभयो । प्रदेश प्रमुख खापुङले भाषा र साहित्यको माध्यमबाट राष्ट्रिय एकतामा योगदान गर्नुहुने राष्ट्रिय विभूति आदिकवि आचार्यप्रति श्रद्धा प्रकट गर्नुभयो । कार्यक्रममा उहाँले साहित्यकार नरेन्द्रराज पौडेल (सिन्धुपाल्चोक), कवि एवं नाट्य निर्देशक अशेष मल्ल (धनकुटा), साहित्यकार पद्मराज जोशी (कैलाली), पिण्डेश्वर संस्कृत मावि धरानका संस्थापक प्रा पुरुषोत्तम भट्टराई, साहित्यकार एवं संस्कृतिकर्मी मान बज्राचार्य (चतरा, सुनसरी), उपन्यासकार जानुका खतिवडा (झापा)लाई सम्मान तथा नगद पुरस्कार प्रदान गर्नुभयो ।