एजेन्सी
ढाका, २६ कात्तिक
अन्तर्राष्ट्रिय मुद्रा कोषले बंगलादेशलाई ऊर्जा र खाद्यान्नको बढ्दो मूल्यको सामना गर्न मद्दत गर्नको लागि ४.५ अर्ब डलरको सहयोग प्याकेज उपलब्ध गराउन प्रारम्भिक सम्झौता गरेको जनाएको छ । रुसले युक्रेनमा गरेको आक्रमणपछिको मूल्यमा भएको तीव्र वृद्धिले अन्य एसियाली अर्थतन्त्रहरू जस्तै बंगलादेशलाई नराम्ररी असर गरेको छ, जसका कारण सर्वसाधारणहरु सडक आन्दोलनमा उत्रिएका छन् ।
करिब १७ करोड जनसंख्या भएको दक्षिण एसियाली देशले यस वर्षको सुरुमा सहयोगका लागि आईएमएफलाई सम्पर्क गरेका थिए । आईएमएफ र ढाकाका प्रतिनिधिहरूले विभिन्न सुविधाहरू अन्तर्गत कुल ४.५ बिलियन डलरको साथ ‘बंगलादेशको आर्थिक नीतिहरूलाई सहयोग गर्न कर्मचारी स्तरको सम्झौतामा पुगेका थिए’ संस्थाले एक विज्ञप्तिमा भन्यो । यो सम्झौता आईएमएफ व्यवस्थापनको स्वीकृतिको विषय थियो ।
