सिङ्गापुरका प्रधानमन्त्रीद्वारा सरकारमाथि विश्वास गर्न आह्वान

सिङ्गापुरका प्रधानमन्त्री ली सिएन लुङले मङ्गलबार आफ्नो राष्ट्रिय दिवसको सन्देश दिँदै शासन प्रणालीलाई भ्रष्टाचारमुक्त राख्ने प्रतिवद्धता व्यक्त गर्नुभएको छ । सो अवसरमा उहाँले अख्तियारप्रतिको विश्वास बलियो बनाउन पनि नागरिकहरूलाई आह्वान गर्नुभएको छ । देशमा राजनीतिक व्यक्तित्वहरू संलग्न भएको विभिन्न किसिमका अनादरका मुद्दाहरू बढेको उल्लेख गर्दै लीले सरकार भ्रष्टाचार र गलत कार्य नियन्त्रण गर्न कटिबद्ध रहेको उल्लेख गर्नु भएको छ । सम्बोधनका क्रममा दुई जना मन्त्रीले सरकारी सम्पत्ति भाडामा लिएको अभियोग, यातायात मन्त्रीमाथि भ्रष्टाचारको छानबिन र पूर्व सभामुख र संसद् सदस्यको राजीनामालगायतका विषयलाई समावेश गर्नु भएको छ। प्रधानमन्त्री लीले आफ्नो राष्ट्रिय दिवसको सन्देश देशको आवास र विकास बोर्डद्वारा निर्मित नयाँ सार्वजनिक फ्ल्याट समुदायमा लक्ष्यित गर्दै सिंगापुरका जनतालाई राम्रो र किफायती सरकारी अनुदान प्रदान गर्ने वाचा दोहोर्याउँनु भएको छ । सिंगापुरले आफ्नो ५८ औँ राष्ट्रिय दिवस अगस्ट ९ मा मनाउँदै छ ।