जुम्ला, २४ असोज
जुम्लाको प्रतिनिधिसभा सदस्यका लागि पाँचजनाको उम्मेदवारी परेको छ । गठबन्धनका साझा उम्मेदवार गोमा गौतम कुँवर, एमालेबाट रतननाथ योगी, राष्ट्रिय प्रजातन्त्र पार्टीबाट ज्ञानबहादुर शाही, नेपाल मजदुर किसान पार्टीकाट डिल्लीप्रसाद काफ्लेको उम्मेदवारी परेको मुख्य निर्वाचनअधिकृतको कार्यालयले जानकारी दिएकाे छ । काफ्ले नेमकिपाबाट संविधानसभा सदस्यसमेत हुन्।
मुख्य निर्वाचन अधिकृत विष्णुप्रसाद गौतमका अनुसार संघीय सांसदमा डा. कलबहादुर रोकायाको स्वतन्त्र उम्मेदवारी परेको छ । रोकाया माओवादीका केन्द्रीय सल्लाहकार समिति सदस्य हुन् । मुख्य निर्वाचन कार्यालयका अनुसार जुम्ला प्रदेश (क) बाट ६ जना र प्रदेश (ख) बाट सातजनाको उम्मेदवारी परेको छ ।
प्रदेश सभा (क ) गठबन्धनका उम्मेदवार नेपाली कांग्रेसका कर्णाली प्रदेश सभापति ललितजंग शाही, एमालेबाट धिरेन्द्रराज गिरी, राप्रपाका अंगतप्रसाद देवकोटा, नेमकिपाका राजेश्वर देवकोटा, राप्रपा नेपालका अग्निप्रसाद धितालको उम्मेदवारी दर्ता भएको छ।
स्वतन्त्र उम्मेदवारी देवेन्द्रबहादुर शाहीको परेको छ । शाही नेपाली कांग्रेसका महासमिति सदस्य हुन् । उनी २०७४ को स्थानीय निर्वाचनमा नेपाली कांग्रेसबाट प्रतिनिधिसभाको उम्मेदवार उठेका थिए।
जुम्ला प्रदेश सभा (ख) मा सातजनाको उम्मेदवारी परेको छ । मुख्य निर्वाचन अधिकृत गौतमका अनुसार गठबन्धनका साझा उम्मेदवार एकीकृत समाजवादीका केन्द्रीय सदस्य तथा कर्णालीका भौतिक पूर्वाधारमन्त्री पदमबहादुर रोकायाको उम्मेदवारी परेको छ । प्रदेश (ख) मा एमालेका टेकराज पछाई, राप्रपाका देवप्रसाद न्यौपाने, नेमकिपाका बिर्खबहादुर रावतको उम्मेदवारी परेको छ ।
प्रदेश (ख) मा तीनजनाको स्वतन्त्र उम्मेदवारी परेको छ । नेपाली कांग्रेसका पूर्वसभापति दिपबहादुर शाही, धनबहादुर बस्नेत, नन्दराम रोकायाको स्वतन्त्र उम्मेदवारी परेको छ । रोकाया एकीकृत समाजवादीका जिल्ला नेता हुन् । मौसम खराबीका कारण धेरैजसो उम्मेदवारले वारिसे दर्ता गराएका मुख्य निर्वाचन अधिकृतको कार्यालयले जनाएको छ ।
